 يوميات متقاعد
السلام عليكم ورحمة الله وبركاته
بمناسبة اني متقاعد مثله 1-6-1430
احببت ان اشارك في يومنا العزيز بهذه اليوميات
متقـاعد أشغـل السلطات الأمنيـة
.
حياكم الله جميعاً
قبل مانبدى في الموضوع راح اذكر لكم الشخص اللي راح نتحدث عنه وهو أبو سعد يبلغ من العمر 62 عاماً كان موظف في
وزارة التربية والتعليم على المرتبة التاسعة وتقاعد حين وصوله لسن 60 سنة – وسووله عزيمة تسكيت وهو يبتسي من الفرحة
ومن مفارق عمله بعد هالخدمة
سلم على زملائه ويحبب فيهم واحد واحد حتى القهوجي
وقالهم ترى كل ماخذيت فترة بسير عليكم مسح دموعة بشماغة وطلع من وزارة التربية والتعليم وهو ملتفت للوزارة ويتبادر في
ذهنه أول يوم استلم فيه الوظيفة والترقيات اللي أخذها من خلال مسيرته في الوظيفة والحين حان وقت الوداع بعد خدمة دامت
لأخفيكم أن ابو سعد تجرع مرارات الحياة – وذاق الضيم وهو يكون مستقبله ويبني بيته ويربي عياله – الحين جاء الوقت اللي
يريح فيه ويتفرغ للمجتمع ولمواهبه اللتي دثرها الزمن من خلال مكابدة الحياة
بعد التقاعد ابو سعد يصحى لصلاة الفجر ويروح يصلي وبعدين يرجع يصايح في البيت وين قهوتي يـ ام سعد وانتم ناس راعين
نوم يالله قومي وقومي عيالتس يكدون على بطونهم انا خدمت 35 سنة ماعمري تأخرت دقيقة وحدة على دوامي انا كان يظرب
فيني المثل في جميع إدارات التعليم بجديتي وإتقاني لعملي وعيالتس للحين يفخون في مراقدهم – و أبو سعد كل يوم على
هالموال
في الناحية الثانية سعد الأبن الأكبر يتمتم من تحت بطانيته ( ياها الشايب اللي بيذلنا في وظيفته عشرين سنة قدام الله يهديه )
في أثناء تمتمة سعد الا ابو سعد يخبط باب الغرفة برجلة بكل ما أوتي من قوة الحين ورى ماتقوم تصلي وتروح تداوم الطيور
طارت بأرزاقها وانا ابوك وانت نايم أنا يوم كنت في وظيفتي ماكنت أتأخر دقيـ.. يقاطعة سعد دارين يايبه ماتتأخر دقيقة وكل
إدارات التعليم يثنون عليك ومعطينك شهادات شكر بس تكفى خلني انام شوي ترى دوامي الساعة 9 والحين الساعة 5:30 يعني
باقي 3 ساعات
راح سعد لدوامه ويرجع الساعة 3 العصر الا يلقى شايب متعلق فوق جدار البيت ومعه طشت فيه اسمنت – نظر سعد بذهول
لأبوه يايبه وش مرقيك في هالقوايل – خلني وأنا ابوك بسد هالفتحات اللي يطلع منها النمل اوذتنا وابثرتنا كل بيتي نمل يايبه
الله يهديك مافيه نمل ولاشيء انزل لاتضربك شمس ونبحل بك – انزل تكفى طلبتك
نزل ابو سعد من فوق الجدار وراح يغسل للصلاة – وبعد مارجع وشرب شاهيه حس فيه صرصرة في باب الشارع كما جرت
العادة توجه للمخزن وجاب العدة وقام يزيت في الباب لين راح الصوت
جمعة العائلة بعد صلاة المغرب مع ابو سعد وأبنائه – سعد يسولف على أبوه عن البورصة والأسهم وان الناس هابين فيها الا
يخطم أبو سعد ويقول وش رايكم ياعيالي انا هالملحق الخارجي ماحبيته احسه ضيق وفيه مساحة ما أستغليتها في بيتي وش
رايكم نقض هالجدار ونوسع الملحق ونحط لنا مشب عشان اذا جانا الشتاء نتدفى ونجتمع كلنا فيه يرد سعد ايه وينك وين الشتاء
تونا عليه اذا جاء الشتاء فيها حلال
بعد صلاة الفجر من اليوم التالي اصوات مرعبة في البيت ( طااااااااخ طيخ طاااااااااااخ ياصديق انتبه لايتصدع جدار البيت
بشويش بشويش ) قام البيت كله يشوف وش السالفة وش الانفجارات اللي تصير بالبيت الا ابو سعد جايب له 3 باكستانية
يقضون جدار الملحق ومطلع عفشهم كله بالحوش تلفزيونهم وزوليتهم والتربات عليها وحايسهم حوس ينزل سعد على ابوه –
يايبه حرام عليك وش قاعد تسوي في هالفجر الناس نايمة الحين وانت مالك الا علمك تقض وتكسر ولاتشاور ولاتقولنا انك
بتجيب عمال ياوليدي مهيب صناعة صاروخ انا قعدت اهوجس البارح قبل ما أرقد وشفت ان الفكرة زينه طيب يايبه الجيران
نايمين حرام عليك كان خليتها العصر – لا وانا ابوك انت ماسمعت بالمثل اللي يقول الصباح رباح
في نفس اليوم بعد صلاة العشاء وهو يفتح الباب يشوف سيارة فيها شباب مارين ومالهم من الشيطان طاري – الا يلقط الجوال
ابو سعد ويدق ... آلو الشرطة ياوليدي فيه شباب لهم ثلاث ايام يدورون على بيتي الظاهر الله العالم انهم بيسرقون شف انا
بتغافلهم وانتم تعالوا امسكوهم < ياولله البلشة
جت الشرطة – وين يابوسعد اللي تقول يدورون على بيتك – والله ياوليدي توهم فيذا مدري وين طسوا له بس بركب معكم
وندورهم تراهم مهب مبعدين – بس وقف وقف هذولي هم اللي عند البقالة نزل الشرطي وكلم راعي السيارة الا أبو سعد ينزل
وراهـ - الحين وراكم تحوسون على بيتي يابن الحلال ماجينا لبيتك ولانعرفك - حنا واقفين للبقالة بنشتري غرض ونمشي يرد
الشرطي على ابو سعد اخاف انك مشبه – لاهذولي هم – في اثناء الشد والجذب مع الشباب يمر سعد الا يشوف ابوه مع الشرطة
افااااا هذا ابوي الا والله ابوي – وقف ونزل سعد من السيارة – سلامات وش اللي صاير ياحظرة الشرطي من أنت !!؟ هذا
ولدي سعد يشتغل في الخطوط السعودية اذا بغيت شيء ولاشيء تراه مهوب يقصر السالفة ياسعد ان ابوك مشتبه في هالشباب
ويقول انهم يدورون على البيت يبون يسرقون ههههههههههه يايبه وش بيسرقون تكفى كل بيتنا نخلة وملحق مهدوم وشهادة
شكر حقتك – مشينا بس يايبه خلهم في حالهم – ركب ابو سعد مع ولده ورجعوا للبيت
من بكرة وفي اجتماع العائلة بعد صلاة المغرب ابو سعد يتمتم بينه وبين نفسه ياربي متى هالولد يعرس واشوف عياله يرد سعد
تراي سمعتك ان شاء الله قريب قريب قايل للوالدة تدور لي زين وانا ابوووك هذا السنع اجل تدري خلني باتسر اعلم العمال
يجيبون لنا بلك ونبني لك شقة فوق فيما تخلص الا انت زاهب للعرس لاتكفىىىىى يبه طالبك طلبه كلش الا العمال ماتحملناهم
بالحوش نتحملهم فوق روسنا – اووعدك اني بعرس بس تكفى أجل سالفة الشقة ، ولاتدري انا بشوف لي دور قريب في الحارة
وبستأجره بس لاتبني ، يايبه بيتنا تخلخل من كثر ماتقض فيه ، بعدين الجيران بيدعون علينا مشغلينهم في هالصبح وانا ابوك
ترى المقصد اني ابي اشوف عيالك بس بتشوفهم ان شاء الله بس بدون تكسير
ألو السلام عليكم ، شركة الكهرب ايه سم وش بغيت – ياوليدي الله لايهينك احس النور عندي مهوب ذاك الزود مدري هو العداد
خلص عمره الافتراضي او ان يبي لي زيادة الامبيرات حقته ودي تجون تشوفون وش السالفة ابشر ان شاء الله اليوم جايينك
عقب صلاة العصر – سعد وهو راجع من الصلاة الا يشوف شركة الكهرب عند بيتهم افااااااا شركة الكهرب عند بيتنا وش مسوي
ابوي لايكون شاب في الغسالة ولا الثلاجة وشب العداد الله يستر
وش عندك يبه مع شركة الكهرب ابد وانا ابوك حسيت ان نور البيت مهوب مثل أول وقلت اشوف العداد وش فيه – يرد الفني
حق شركة الكهرب يابو سعد عدادك سليم ومافيه الا العافية لا وين سليم اقولك البارح وانا جاي من صلاة العشاء نور البيت
يأشر غيروا العداد ولازيدوا امبيراته يايبه وش يغيرون الله يهديك عدادك زين ومافيه الا العافية الظاهر يايبه ان الشوف عندك
مهوب مثل أول ويتهيأ لك ان النور ضعف وانا ابوك انا ابخص يتغير العداد يعني يتغير اليوم قبل باتسر
اخر موقف لأبو سعد دق على مصلحة المياه يطلب منهم مسبح بس سفهوه وعطوه رقم مصلحة معاشات التقاعد يتصرفون معه
وهذا حال أبو سعد من تقاعد وهو مشغل عياله ومشغل جيرانه ومشغل السلطات الأمنية معه 35 سنه
هل الخلل في المتقاعد ام في المجتمع
للاماااااااااااانه منقول للفائده
عراويكم
| 
19-11-2015, 08:26 PM
رد: يوميات متقاعد 
