السلام عليكم ورحمة الله وبركاته
نعم ساقنت على هوامير مكاتب الاستقدام
يا عيال لا تلوموني والله العظيم احسن اني مقهور وفي صدري غلقتن عيت تطلع وفي تسبدي مرٍ ذابحني من العصر الى الان ولا ينفع فيه لا عنزروت ولا عزيمه ولا قروة بصراحة طالت وشمخت وهوؤلا الشرذمه كل يوم يتمادون ويتفننون في مص دمائنا بكل السبل اليكم قصتي باختصار :
ذهبت الى مكتب استقدام في منتصف رمضان لاستقدام شغاله سيريلنكيه وقال لي الرسوم مع التاشيره 12500 ريال
قلت يا ولد خلني اقدم بعد العيد وافلها مع العائله بالعيد سفريات وتمشيات المهم رجعت للمكتب امس واوراقي معاي والمبلغ جاهز قال زادت الرسوم صارت 14800 ريال قلت ليه ( 2300) قال هذا اللي عندي زعلت وطلعت يوم رجعت للبيت واتفاهم انا وام بركات اخر الليل وقلنا ما تفرق 2300 زياده في سبيل راحة شريكة عمري ما تضر وقررت ارجع له من بكره
المهم رحت له اليوم العصريه والمبلغ معاي قال معليش زادت الرسوم صارت 16800 ريال حسيت اني ودي اخذ الدباسه اللي على مكتبه واصنه على جبهته واروح فيه غلطه على يد
سياف البيشي في ساحة الصفاه لكن لعنت الشيطان وقلت في عقلي بالي العن الشيطان يا ابو بركات لا تروح ضحيه غلطه عشان شغاله
ياناس يا عالم الفين ريال زياده في اقل من 24 ساعه و4200 ريال في 41 يوم يعني ارتفاع بنسبة 35% خلال شهر وعشرة ايام
حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل حسبي الله ونعم الوكيل
يا مشرفين لا تنقلون الموضوع او تقفلونه ترى موضوع اقتصادي بحت بحت